“愛思索便會福薄”

  

我聽咗<<你們的幸福>>超過100 次, 唔係因為鐘意謝安琪, 都唔係D音樂, 我一直留意既係歌詞. 歌詞內容大至上係諷刺現代人生活忙碌怕寂寞怕思考怕沉悶怕停頓得過且過等, 慾望好superficial 係吃喝玩樂. 哲学家Plato都講過呢D係好低層次既事情, 公元前到現代一直都存在, 我地唔係聖人, 我地都會怕寂寞. 而社會上既流動力, 一個一個flow咁快速侵入我地既四周, 而一個一個要我地花時間去睇去了解, 時間一分一秒變得越來越少. 思考既時間亦變少, 根本唔會花時間去思考實際問題.

我初初聽到呢句“愛思索便會福薄”, 我諗咗好耐, 點解林夕會覺得思考會冇福呢? 但諗耐咗其實呢句係諷刺D人唔思考, 成句應該要用 “”括住佢. 我再望返身邊既朋友, 佢地真係好少思考自身/心靈上既問題, 每日都排到D時間密密麻麻, 日日返屋企就瞓, 我問過一個朋友點解日日都要咁忙, 唔辛苦咩? 佢答我佢一停低, 個腦就會思考, 佢就會唔開心.

好奇怪, 其實就算唔諗, 個問題一樣存在, 只不過唔思考俾人既錯覺令人覺得 “砂吹進眼內從來未覺便不必發覺”. 係咪要忙到自身既問題都唔理唔“覺”先開心呢?

我係一個愛思考既人, 我每一日都放大量時間幻想發白日夢, 思考反而令我對自己更了解, 唔好嗎?